KODI LUO TUM KU
Kodi pa luo!
Kodi pa oteka,
Oteka ma wilobo ducu ngeyo
Oteka lweny ma dano weng ngeyo.
Acel kiken!
Acel kiken ma ongayo Wang dul dano me lobo ma pat pat
Acel kiken ma rok ducu ngeyo ni gin aye oteka me lobo
Ka idwoko gi ilweny, gin pat
Gi pat ma gin pe gi gude
Ka idwoko gi ireko, gin gi ryek ma lapore peke
Meno ducu pi yub pa lacwec ma oketo wi gi me bedo lac makato ducu pi mako ngec ki diro idoro dul ngec ma pat pat.
Kodi pa luo pol
Gin dwong ibut piny me lobo
Ikin gi obedo Acoli
Gin gi bore abora ni
Kodi pa lyec
Gin onogo pe gi ngeyo.
Pe gingeyo ni kara gitye mapol ataa itwok piny ma pat pat me wilobo kany.
Acoli gu aa kama bor
Bor ataa
Ilobo ma ikin nam
Nen gi ca!
Gin dwong ataa
Gang gi madit tye ikin pem nam/ Bahr me Gazelle itung piny me lobo Sudan.
Ikin gi obedo collo/ shilluk
Luo!
Gin kara dwong
Anywaa/Anyuak bene obedo gin ki kome
Jaluo ma ilobo kenya ni bene obedo gin.
Alur ducu bene en gin ki kome
Nen gi!
Gin tye,
Ikin gi tye Jopadhola
Akadi bed bur adola oyelo gi.
Omera!
Akemo dwong ento gubu pe,
Nen baa,
Ka wa ribo cing wa, ci gang dongo.
Gang wa dongo!
Dongo maber, lamal calo byee alwiri
Wun omegi wa!
Kumam,
Pe odok wunu kakumu baa,
Wa maku wunu tic
Ram kob koni bino ngayo wa woko baa.
Akaa!
Dano kara rweny,
Dano kare rweny ki ngec ka kare dong owoto malac ma gin pe ki ngene ikin gi.
Lutwa!
Nen ba,
Kara Boor bene obedo gin ki kome
Pari kono?
Meno ducu gin kiken
Balanda Boor kono?
Pe wurweny gen baa,
Menu ducu gin .
AKaa!
Wan onongo wa rweny
Wa rweny ma tol obeno ocot
Ocot woko ni tup tup.
Nen ba,
Tin dong wa ngeyo
Wa ngeyo, iadaa ma ngat mo pe tuku kwed wa
Wa ngeyo ma poko kin wa dong tek
Ma kadi wa oyeng yeng
Pe twero poko kin wa
Nen gi bino ca!
Meno omegi wa
Gin joluo me Tanzania
Meno ducu luo
Joluo me Kenya bene
Gin omegi wa ki kome.
Akaa!
Wilobo,
Nen Lutino wa ca
Gin tye atera pi jami tucu ma lobo twero miyo gi.
Nen gi bino ca,
Gin gubedo kodi ma beco
Gin ngeni ki tekwaro gi ni
Wan kodi pa Dimo
Wan kodi pa Nyikang
Wan kodi pa Acol
Wan kodi pa Olum
Wan kodi pa Labongo
Wan kodi pa Gipir
Wan kodi pa Adola
Wan kodi pa Lamogi
Wa ringo,
Wa ringo bot gi
Ka odoko rac
“Labwo mwodo yago”
Anga ma pe ngeyo,
“Ni remo pek loyo pii.”
By Lamac A., (2025)
