PINY DONG COK KI RUU
Tye aboka lam!
Cwiny dano opong ki cwiny me kuc ki diro me dongo lobo.
Angaa ma pe ngeyo ni Acoli kombedi ni mito kuc?
Kuc okato wa pi kare ma lac.
Man ducu pi adwogi me lweny pi mwaki ma pol ataa.
Opong wiye malo.
Cwiny dano tye ki miti pi kuc.
Piny mono romo ruu ka pe okato ki icol?
Piyen pi man,
Piny dong cok ki ruu .
Diro meno onongo peke. Ongayo lacwec woko.
Omyero kong ikat ki icol piny ka ibin itaa piny.
Man ducu gin ma tye katime ilobo Acoli.
Miti pi kuc ki roco paco wa me lobo Acoli_Kombedi tye lamal.
Man ducu ocung ikom dyere me doro yub meno.
Dok wa pong ki gen ikom tic ma tye ka time ikare man.
Piny dong cok ki ruu .
Pot yat gi kok,
Kebekebekebe … nongo yamo tye ka kodo.
Iwinyo ki dwane ki tic ma en tiyo
Ka imoko ni en kara tye.
Ka pe in ci angaa ?
Dul ma luryeko tye iye me yubu paco wa.
Acoli macon guti gi ocung ikom
● Lok adaa
● Doro paco
● Pit ki cam maber
● Diro me pur maber
● Dero ngec
● Gwoko kit me ngec ki tiyo tic me tekwaro
● Galo Wang ki myel idiro ma pat pat.
Tee!
Tee dong tye ma onuru wa!
Acoli dong koko kor gi
Gin dong guwoto wot kama bor atika atika.
Gin guol woko.
Tee odoko pek iwii gi.
Dong gi cok ki yeyo ne piny.
Akaa, lobo man!
Kong inen ka ilok tawoke ma pwol ne ni dong kong doo, owek gin kong guywe ma nok.
Akaa, lok lobo.
Lok lobo dwong ba.
Lutino pa jii tin deno can.
Layom cwiny kara ki gero ki nyany ada doo.
Ludito wa nene pe guneno matut ikom kop me lobo.
Omiyo gin gupoko pok alenga.
Ka inen jami odoko tek ikare me tute ni me yubu ne omyero ibed ki gen ni nongo dong icok ki aa woko ki ipeko ma tye ka nuru in ma tek ni.
Cung matek. Mak ni rit gin ma itye ka timo ne ni. Mede kwede Latin wa.
Nge ni dong cok ki ruu. En piny dong cok ruu.
Ngwec kuc ngue.
Obino ma oboke ogom.
Piny ma ocido woko ni tik tik ka oumu polo woko ni muk calo kot ayom dene ni dong akadi wa
Latal kot pe ywayo yaa.
Yom cwiny cok ki poto ipaco waa ki icwiny wa ducu adaa doo!
Adaa! Wat obeno ma yam tye tek ni tin cok ki dwogo.
Wa dero ma nene yam con pong wiye malo idye kal ni tin dong ocako dwogo woko ilobo wa me Acoli.
Boo ma Aguu ( lukwo, lubupiny ) deg ki neno ne idyang kal ni tin tye ka cung ni rit idye paco wa.
Magi ducu ocung ki teko me yub me roco ki doro paco wa me lobo Acoli.
Tol obeno ma yam con ocot woko ni tin dong ki kubu woko adaa doo lupwa?
Lawino, iwinyo?
Obol, Omera in kono iwinyo?
Gum wa kara pwud tye adaa.
Gin tye!
Nen Owiny Dolo Cigamoi tye. En owinyo peko ki koko wa.
Nen Olara Otunu tye. En ocung ni rit pi laro wa ki ican pa larac catan ki ipeko ma dong onuru wa pi kare malac ikin mwaka pyera angwen kom bedi.
Ngo ma pwudi odong ma wa peke kwede?
Ka ngec me cik, cigamoi tye
Ka ryeko me kwan, Olara Otunu tye.
Ngo ma odong?
Tic matek ki ryemo can ilobo wa me Acoli.
Bor kec,
Too onuru wa!
Man ducu Tic cilo pa Bor kec
Bor kec otyeko wa woko.
Lawino, ityee?
In ineno kwene doo maa?
Adaa, dano too. Ento cwiny/ tipo ne bedo makwo naka naka. En neno ka ngeyo tam ma icwiny wa ducu ki acel acel.
Maa Lawino, nen wa. Par pi wa doo!
Akaa, tin wakok boti.
Nen wa ki can ma tin oumu wan ni muk calo got abayo ma opoto ki ipolo ka oumu dano woko ni muk ki igang myel
Maa, nene con Acoli owaco ni,
“Mego aye en koro” doo.
Coo otoo!
Lutino otoo!
Mapol ataa iadaa onongo gitye ka yenyo kuc, doro ki dongo paco gi.
Man dok tin angaa ma medo kor Olara gin ki Owiny?
Tic guji orom kom wa woko.
Akadi too bene dong tye ma oromo kom wa woko.
Itamo ni too gi onongo pe cwero cwiny jii cee?
Adaa, maa doo!
Wot dong owote doo.
Wat obeno ma nene con ni tin dong oket woko aboka lam. Oket ni teng teng calo turu obia.
Ka tam twero Tic,
Ci tam bene omine doo!
Ka lweny twero Tic,
Ci lweny bene olwenye doo!
Ki miyo tam mapol ataa, ento adwogi née pe yaa onen.
Ki lwenyo lweny mapol ataa ento adwongi ne me kuc ki dongo lobo peke.
Wa neno can, dok wa deno can calo olik olik, ikit ma pat pat, lutwa!
Akaa, too, man!
Man dok tin ikom angaa?
Opoto ni twalaka caa.
Tin wa ringo wadok kwene?
Wa dok bot agaa cee?
Too man oumu paco waa ni puk calo uderu ma umu lutino winyi matye ka cam ioduu bel.
By Lamac A., (2025)
